Հայտնաբերվել է փայտանյութով բեռնված ավտոմեքենա
ՇՄՆ Էկոպարեկային ծառայության կողմից շարունակվում է անտառներում, անտառային հողերում և բնության հատուկ պահպանվող տարածքներում իրականացվող կանխարգելիչ-հսկողական միջոցառումների իրականացումը:
Էկոպարեկային ծառայողներն իրենց ծառայության իրականացման շրջանակում անօդաչու թռչող սարքի կիրառմամբ ՇՄՆ «Հայանտառ» ՊՈԱԿ-ի «Իջևանի անտառտնտեսություն» մասնաճյուղի Խաչարձանի անտառպետության հարակից տարածքում նկատել են փայտանյութով բեռնված «Ֆորդ Տրանզիտ» մակնիշի մեքենա, որի վարորդը, նկատելով անօդաչու սարքը, փորձել է թաքնվել անտառում։ Համապատասխան ծառայողների կողմից տեղեկատվությունն անմիջապես փոխանցվել է Էկոպարեկային ծառայության օպերատիվ կառավարման կենտրոն (1-07)։
Ստացված տեղեկատվության իրացման շրջանակում ԷՊԾ Տավուշի մարզային վարչության Իջևանի տեղամասի էկոպարեկներն օպերատիվ կերպով ժամանել են նշված վայր և նրանց կողմից ձեռնարկված միջոցառումների արդյունքում հայտնաբերվել է փայտանյութով բեռնված «Ֆորդ Տրանզիտ» մակնիշի ավտոմեքենան, որի վարորդ Տավուշի մարզի Դիլիջան բնակավայրի բնակիչ Վ. Հ.-ն համապատասխան բացատրական աշխատանքների արդյունքում
ընդունել է իր կողմից կատարված իրավախախտումը՝ ապօրինի հատված փայտանյութի դուրս բերումն անտառից։
Դեպքի առթիվ կազմվել են օրենսդրության խախտման և վարչական իրավախախտման վերաբերյալ արձանագրություններ, կատարվել է բուսական աշխարհին պատճառված վնասի հաշվարկ, իսկ փայտանյութով բեռնված «Ֆորդ Տրանզիտ» մակնիշի ավտոմեքենան տեղափոխվել է Տավուշի մարզային վարչության Իջևանի տեղամաս: